時代改變，整形手術同注射式美容療程，愈來愈為人接受。最近呢幾年，每逢暑假，都會睇到南韓或者大陸，有關高中、大學畢業生整容嘅報道。佢哋趁暑假，整雙眼皮、隆鼻，或者改臉型，希望修飾儀容，增加搵工面試嘅競爭力，畀僱主有良好印象，增加搵工機會。
坦白講，點樣容易獲僱主聘用，美麗外表並唔係最重要，面試嘅臨場表現，學業成績，以及工作技能等，都係重要一環。
不過，從心理角度睇，一個順眼或者頗為標緻嘅容貌，確實會增加面試者嘅自信心，亦或多或少令僱主，留下一個較好嘅印象。而近年搵我整形或抽脂嘅病人，亦多咗一類轉工求職人士，同埋由家長帶嚟嘅十八、十九歲女學生。
先講為咗轉工整形抽脂嘅病人，佢哋好多時都係趁轉工前嘅空檔期，略略「執一執」外表，諗住畀我好印象僱主，增取搵工機會。有啲會割雙眼皮，打針瘦面，有啲見大腿外側肥，有小肚腩，或者手臂Bye Bye肉鬆弛，仲會選擇做埋抽脂手術。
佢哋同我講，平日已經好努力Keep Fit做運動同節食，但始終減唔到個小肚腩。
有個做化妝品銷售員嘅patient同我講，話佢哋嗰行壓力好大，若果有小肚腩，bye bye肉，會影響顧客信心，所以希望抽脂重塑身型曲線，轉職其他化妝品公司會大啲機會。至於十八，十九歲嚟抽脂嘅少女，佢哋好多時都係由媽媽帶嚟clinic。啲媽媽好多本身都試過抽脂或者整形，所以帶個女求診。
-----------------------------------------------------------------------------------------------------------------------------
姑勿論係乜嘢原因要抽脂，我都會同病人解釋清楚，進行抽脂嘅過程外，仲會強調抽脂只係抽取皮下脂肪，重塑身型，絕對唔可以有錯誤觀念，以為抽脂身型曲線靚咗，就一定可以搵到工，得到自己想要嘅嘢。我一定要patient想清楚有冇抽脂需要，先安排做抽脂手術。
好多時patient仲有個錯誤觀念，以為脂肪愈抽得多愈好。其實可唔可以做抽脂手術，要符合各方面條件，唔可以有大吃大喝外，仲唔可以有貧血或者其他長期病患。抽取嘅皮下脂肪，最多只可以抽走六至七成，唔可以過多，因為皮下仲要有正常脂肪運作。
其實，每個抽脂位置，最多只可以做兩次抽脂手術，千奇唔好以為可以做好多次。因為人體嘅脂肪細胞數目喺發育完成後，就已經固定咗。 換言之，當做抽脂手術後，手術位置嘅脂肪細胞數目就會減少咗，唔會再增加。 即使日後抽脂部位再肥番，都係餘下嘅脂肪細胞膨脹而引致。
所以，做抽脂手術後，大家要注意飲食習慣同做運動，切忌大吃大喝！！！
Dr Chan Wing Shung Edward
